05 April 2017

खोटं ओळखता येईल का?

तीन चार वर्षांपूर्वी पाहिली होती ही मालिका - Lie to Me. चेहेऱ्यावरील सुक्ष्म हावभाव व देहबोली ओळखण्याची कला अवगत असलेला डॉक्टर कार्ल लाईटमन कशाप्रकारे खोट्यामागे दडलेलं खरं उजेडात आणतो, त्यावर ही मालिका बेतलेली होती. टिम रॉथचे बरेचसे संवाद ब्रिटीश उच्चारांमुळे subtitles शिवाय कळत नाहीत पण क्षणाक्षणाला उत्कंठा वाढवणारी मालिका होती.

धर्मनिरपेक्षता अशी असते का?

हिंदूंच्या "धर्मनिरपेक्षतेचं" कौतुक करावं तेवढं थोडंच आहे. हे मी हिंदू संस्कृतीबद्दल आस्था आहे म्हणून बोलत नाही. माझ्या दृष्टीने ज्या देशात धर्मापेक्षा देशहिताची काळजी जास्त वाहिली जाते, तोच खरा आदर्श देश असेल पण धर्मविविधता, संस्कृती संगम झालेल्या भारत देशामध्ये इतर धर्मांच्या तुलनेत हिंदू धर्मियांच्या भावना आपल्याच धर्माबद्दल बोथट झालेल्या आढळतात. कुणीही यावं, हिंदू धर्माला काहीही बोलावं आणि हिंदूंनी नंदी बैलासारख्या माना डोलावाव्यात असं झालं आहे.

30 March 2017

Art Of Marketing

गेल्या आठवड्यात नेटभेटने आयोजित केलेल्या ’Art Of Marketing / मार्केटिंगची कला’ ह्या चर्चासत्रामध्ये अत्यंत उपयुक्त, मोलाची माहिती मिळाली. तीन तासांच्या ह्या कार्यक्रमात मार्केटिंगच्या चतु:सुत्रीचा वापर आपल्या व्यवसायाच्या वृद्धीसाठी कसा करावा ह्याबद्दल सविस्तर मार्गदर्शन मिळालं. ह्याशिवाय सेल्स आणि मार्केटिंगमधला मुलभूत फरक जाणून घेण्यात मदत झाली.

अत्यंत माफक शुल्कामध्ये, सहज समजेल अशा भाषेत... मुख्य म्हणजे मातृभाषेत ही सर्व माहिती दिल्याबद्दल नेटभेटचे मन:पूर्वक आभार.

22 March 2017

हिंसा


फेसबुक फ्रेंड प्रसाद शिरगांवकरने डॉक्टरंवर झालेल्या हल्ल्याच्या निमित्ताने त्याच्या मनातील खळबळ बोलून दाखवली आहे. त्यावर मलाही व्यक्त व्हावसं वाटलं म्हणून हा लेखप्रपंच.

माझं व्यक्तीश: असं निरिक्षण आहे कि हिंसा दोन प्रकारांमधून केली जाते:
उपलब्ध परिस्थिती आपल्याला अनुकूल आहे म्हणून किंवा अगतिकतेमधून.

सत्तेचा, सामर्थ्याचा विनाकारण माज आला कि त्या व्यक्तीला हिंसा घडवून आणायला कारण लागत नाही. त्याच वेळी ज्या व्यक्तीवर ती हिंसा घडत असते, त्या व्यक्तीने हात उचलणं ही अगतिकतेमधून केलेली हिंसा असते. स्वसंरक्षणाशिवाय इतर कुठलाच पर्याय शिल्लक न राहिल्यामुळे आलेली अगतिकता.

डॉक्टरांवर झालेल्या हल्ल्याची संपूर्ण बातमी मी वाचलेली नाही, त्यामुळे त्यावर जास्त बोलू शकणार नाही पण हिंसेच्या कृतीचा केव्हाही निषेधच आहे.तूर्तास एवढं मत मांडू शकेन कि एखाद्या अनुचित कृतीला रोखणारी पर्यायी व्यवस्था कणखर नसली कि त्या कृतीची पुनरावृत्ती होणं अटळ आहे. एकदा हल्ला होणं ही प्रतिक्षिप्त क्रिया असू शकेल पण त्याची पुनरावृत्ती म्हणजे उघड उघड संधीचा फायदा घेणं आहे.

10 February 2017

किडे

काही वर्षांपूर्वी उपवनला निळकंठ कॉम्पलेक्स इमारतीचे फोटो काढत होते. गेली अनेक वर्षे माझी फोटोग्राफी बाल्यावस्थेत हा भाग निराळा पण "विथ DSLR इव्हन मंकी थिंक्स..." सारखं मलाही एका खांद्यवर कॅमेऱ्याची बॅग आणि दुसऱ्या खांद्यावर ट्रायपॉड घेऊन चालताना लय भारी वाटत होतं.

मी ट्रायपॉड सेट केलाच असेल तेवढ्यात एक छावा, त्याच्या छावीचा हात धरून माझ्या दिशेने आला आणि मला म्हणाला, "एक्सक्यूज मी, व्हॉट डु यू थिंक, यू आर डुईंग?"

25 January 2017

Blog 25012017

मासिकपाळीसाठी उपयोगी पडतील असे पुन्हा धुवून वापरता येण्याजोगे नॅपकिन बनवणाऱ्या स्त्रियांचा एक ग्रुप फेसबुकवर आहे. त्यांचा उद्देश एकच आहे कि पर्यावरणात आणखी प्रदूषणाची भर घालू शकतील असे सॅनिटरी नॅपकिन्स वापरण्यापेक्षा आपण कापडाचे पॅड्स बनवावेत जे वारंवार वापरात आणता येऊ शकतात, जेणेकरून पैशांचीही बचत होते. ह्या ग्रुममधील सक्रिय सदस्य महिला ह्या बहुतांश परदेशीच आहेत.

ह्या ग्रुपमध्ये कुणीतरी श्री. अरूणाचलम मुरूगनंथम ह्यांची माहिती असलेली एक पोस्ट शेअर केली. श्री. मुरूगनंथम ह्यांनी खेड्यापाड्यातल्या महिलांसाठी अत्यंत स्वस्त दरातील चांगले सॅनिटरी नॅपकिन्स उपलब्ध करून देण्याची प्रक्रिया शोधून काढली आहे. त्यामुळे महिलांचे आरोग्य तर टिकून राहतेच पण अनेक महिलांना नॅपकिन बनवण्याच्या कामामुळे रोजगार देखील मिळाला आहे. श्री. मुरूगनंथम ह्यांच्या कामामुळे अनेक खेड्यापाड्यातील महिलांना मासिक पाळीच्या दिवसांत दिलासा मिळाला असेल. The Man Who Wore the Sanitary Napkin ह्या नावाने गुगल सर्च केलं तर त्यांच्या कामाची सविस्तर माहिती मिळू शकेल.

ग्रुपमध्ये पोस्ट शेअर झाल्यावर ग्रुपमधील एका परदेशी महिलेने निष्पापपणे हा प्रश्न विचारला कि, "मुरूगनंथम यांचं काम छानच आहे पण धुवून पुन्हा वापरता येण्याजोगे नॅपकिन्स त्यांनी का बनवले नाहीत?" ह्या प्रश्नानंतर उत्तरादाखल अनेक भारतीय महिलांनी भारतातील महिला मासिक पाळीचा स्त्राव शोषून घेण्यासाठी वापरत असलेल्या कपड्यांची अवस्था, पाण्याचं दुर्भिक्ष्य इतकंच नव्हे तर मासिक पाळी आलेल्या महिलेला दिली जाणारी वागणूक ह्यावर ज्या यथासांग प्रतिक्रिया दिल्या, त्यांचा आश असा होता- "जिथे मासिक पाळीचा स्त्राव सांभाळण्यासाठी चांगला, निर्जंतुक कपडा मिळणंच मुश्किल, जिथे पिण्याचं पाणी दिवसाला जेमतेम एकच ग्लास मिळू शकेल इतका दुष्काळ पडतो, तिथे पाळीचे कपडे धुणं आणि ते पुन्हा वापरणं हीच चैन म्हणायला हवी." पाळीच्या दिवसांमध्ये विविध प्रातांमधील चालीरितींनुसार स्त्रियांना दिली जाणारी हीन वागणूक हा निराळा भाग आहे पण त्याच्याही स्त्रीच्या आरोग्यावर परिणाम होतोच.

ते सर्व वाचल्यावर असं वाटलं कि आपण कितीही झाकून ठेवलं तरी ह्या ना त्या कारणाने सत्य बाहेर पडतंच. इथे नुसता स्त्रियांच्या आरोग्याचा प्रश्न ऐरणीवर येत नाही, आपल्या देशाची इभ्रतसुद्धा जाते. स्वातंत्र्य मिळून आता ७० वर्षं होत आली. आणखी किती वर्ष आपण विकसनशील देश म्हणून "मिरवणार"?

24 January 2017

Blog 01242017

आज Satchidanand Shevde दादांनी पाठवलेला विचार इथे शेअर केल्याशिवाय राहवत नाही.

परैः प्रोक्ता गुणा यस्य निर्गुणोऽपि गुणी भवेत्‌|
इन्द्रोऽपि लघुतां याति स्वयं प्रख्यापितैर्गुणैः||

अर्थ: दुसऱ्यांनी ज्याचे गुण गायले असतील तो जरी गुणी नसला तरी गुणी [मानला] जातो. पण स्वतःच्या तोंडाने स्वतःचे गुणवर्णन केले तर इंद्राला सुद्धा कमीपणा येतो.

23 January 2017

एक वो दिन था, एक ये दिन भी है ।

कबुतरांनी सगळ्या नवीन रोपांची नासधूस केल्यानंतर किचन गार्डनिंगची हौस फिटल्यात जमा होती. कितीही हाकला, जाळ्या लावा कबुतरं नासधूस करायची ती करायचीच. पुन्हा रिकाम्या कुंड्यांचा वापर अंडी घालण्यासाठी करण्याचीही त्यांची तयारी सुरू होती. टोमॅटोचा वेल, डेलियाची बारीक रोपं, मेथीचे रोम, लसणाच्या पाती सगळं, सगळं नष्ट झालं. वैतागून मी सर्व लहान-मोठ्या कुंड्यांमधली माती एकत्र केली; त्यात अत्यंत पौष्टीक असं गांडूळखत देखील होतं. ही माती तशीच ठेवून दिलेली होती. त्यात नामदेव उमाजीकडून आणलेलं प्राजक्ताचं रोपटं लावलं पण अवघ्या आठवड्याभरात ते वाळून गेलं. दोष मातीमध्ये नव्हता हे निश्चित कारण त्यात मी आधी लावलेल्या मिरचीच्या झाडाला अफाट मिरच्या आल्या होत्या.

04 January 2017

कुणाकडे ह्या प्रश्नांची उत्तरं आहेत का?

मागे एका निराळ्या केससाठी पोलीस स्टेशनला गेले होते तेव्हा तिथल्या प्रमुखांना विचारलं होतं कि "बलात्कारासारख्या गुन्हयात अपराध्याला न्याय व्यवस्थेकडून शिक्षा झाली म्हणजे पिडीत व्यक्तीला न्याय मिळतो असं तुम्हाला वाटतं का?

अपराध्याला जी शिक्षा होते ती त्याने समाजविघातक कृत्य केलं म्हणून पण ते कृत्य एका विशिष्ट व्यक्तीला लक्ष्य ठेवून केलं गेलेलं असतं. मग तो अपराधी त्या व्यक्तीचाही गुन्हेगार नाही का?

पीडित व्यक्तीला दिलासा मिळावा, आपला आत्मविश्वास परत मिळावा म्हणून अपराध्याला ठोठावलेली न्याय व्यवस्थेची शिक्षा पुरेशी ठरत असती तर पीडित व्यक्तीसाठी समुपदेशकांची गरज का निर्माण झाली असती?"

त्यांनी फक्त स्मित केलं. इतर कुणाकडे ह्या प्रश्नांची उत्तरं आहेत का?

Kill those monsters...

आपण व्हर्च्युअली राग व्यक्त करण्याचे खूप फायदे आहेत दुसऱ्यांसाठी. असे नराधम समोर आले तर किमान मी तरी कायदेशीर न्याय वगैरे विचार बाजूला ठेवीन. कोथळा बाहेर काढायचा सरळ. कारण आपल्या देशाचीच काय, कुठल्याही देशाची न्याय व्यवस्था अशा प्रकारच्या गुन्ह्यात स्त्रीला न्याय देऊ शकत नाही. आपल्याकडे तर असाही आनंदच आहे. ज्योती सिंग पांडेला न्याय देता नाही आला. मॉलेस्टेशन, ग्रोपिंग ह्या काही विचारात घेण्यासारख्या बाबीच वाटत नसतील कुणाला.

भिकारडे लोक साले तिकडे वर्तमानपत्राच्या लिंक्सवर आपल्या सडक्या विचारांचं गरळ ओकतायंत. सभ्य घरातल्या मुलींनी दारू प्यायली तर चूक पण सभ्य घरातल्या पुरुषांनी दारू पिऊन रासगरबा खेळला तर ह्यांच्या बायकांनी हे घरी आल्यावर यांना पंचारतीने ओवळलं पाहिजे. xyz साले!

काही न्याय वगैरे मिळत नसतो स्त्रियांना. छेडलं तरी त्यांचीच चूक आणि प्रतिकार केला तरी त्याच दोषी. वाघ म्हटलं तरी खातो आणि वाघोबा म्हटलं तरी. अरे, मग वाघ्याच म्हणा ना सरळ!  नाहीतरी आपला समाज, ह्यात घरचे लोकसुद्धा आले... पीडित स्त्रीला सुखाने जगू देत नाहीच. मग आपल्या वाटे जाणाऱ्याला जिवंत तरी का ठेवायचं? उलट तुरुंगात जावं लागलं तरी एक समाधान असेल कि आपला न्याय आपण मिळवला. ते भिकाऱ्यासारखं १०-१० वर्षं वाट बघत, रोज मरण जगत नाही जगलो.

Advertisement


Books I read

Amerikechi C.I.A.
पर्व [Parva]
LOPAMUDRA
Asurved
Sathe Faycus
Nazi Bhasmasuracha Udyast
Mahanayak - A fictionalized biography of Netaji Subhas Chandra Bose
Hullabaloo in the Guava Orchard
The Magic Drum And Other Favourite Stories
Yash Tumachya Hatat
Baba Batesharnath
Panipat
Swami
Shriman Yogi
Mandir Shilpe
Mantra Shrimanticha
Avaghe Dharu Supanth
Women & The Weight Loss Tamasha
Majhi Janmathep
Amrutvel


Kanchan Karai's favorite books »